Miðasala á Óbeislaða Fegurð hafin

Það er eitt betra en að skemmta sér og það er að skemmta sér við að styrkja gott málefni.  Miðinn á Óbeislaða Fegurð þann 18. april  n.k. kostar ekki nema 3.800 kr. og hægt er að panta miða í síma 895 7170 frá kl. 8:00 til 24:00 og í síma 8473 436 frá 12:00 til 18:00 eða á [e-mail]  Fordrykkur, matur, skemmtun,keppnin og ball sjá nánar á heimasíðu keppninnar.  Fyrirtæki á Ísafirði og víðar hafa styrkt keppnina og gerir það okkur kleyft að láta aðgangseyrinn ganga til Sólstafa  systursamtaka Stígamóta á Vestfjörðum.

Það er óhætt að segja að þetta uppátæki okkar hafi fengið mikla athygli.  Keppnin er háðsádeila á fegurðarbransann.  Hvert sem er litið fáum við skilaboð um útlit.  Pressa sem miðar að því að steypa alla í sama mótið og finna hina einu sönnu fegurð.  Kröfurnar er slíkar að einungis fáir uppfylla þær frá náttúrunnar hendi. Hinir sem eru of litlir eða of stórir eru hvattir til að taka nú á sínum málum og gera eitthvað í vandamálinu. Með því að kaupa tiltekið krem,  fara í megrun eða jafnvel lýtaaðgerð.  Fegurðarsamkeppnir vegsama þetta eina sanna útlit og því völdum við þá leið að nota það form.  Með því að taka það sem kallast gallar eða er hreinlega útilokað í hefðbundnum keppnum og hefja það til virðingar, sýnum við fram á hversu fátæklegir og einhæfir þessir staðlar eru.  Við setjum saman í keppni karla og konur, unga og gamla til að sýna fjölbreytileikann og fegurðina í hverjum og einum.

Það verður gaman að sjá hvort dómararnir geta dæmt um fegurð í keppninni eða hvort grípa verður til óhefðbundinna aðferða til að fá niðurstöðu.  Við erum einmitt oft spurð að því hvernig í ósköpunum við ætlum að fara að því að dæma í svona keppni.  Þá höfum við spurt á móti hvernig dæmt sé í hinum hefðbundnu keppnum.  Þær upplýsingar liggja raunar ekki á lausu en við munum nota álíka heimskulegar aðferðir.

Fjölmiðlar um allan heim hafa sýnt þessari keppni mikinn áhuga alveg frá byrjun. Aðstandendur og keppendur hafa verið í útvarpsviðtölum og má nefna AFP, BBC, Newstalk Írlandi, Talk107 Edinborg, ABC Perth Ástralíu.  Eitt eiga allir þessir fjölmiðlar sameiginlegt en það er að þeir komu strax auga á boðskapinn þó kalt háðið hafi verið það sem vakti athyglina.   Satt að segja kom okkur á óvart hversu fáir hafa skammast í okkur fyrir að rugga bátnum en það er yfirleitt ekki vinsælt að rakka niður viðteknar venjur á svona óvæginn hátt.

Athugasemdir

[Hallbjörn Halbjörnsson (IP-tala skráð) 15.4.2007 kl. 09:10]

Sæl Matta, 

Mér finnst þetta frábært framtak hjá þér frænka.

Kveðja Hallbjörn og fjölsk. frá Danmörku. 

[Guðrún Emilía Guðnadóttir, 15.4.2007 kl. 17:39]

                                       Hæ Matthildur.

Gaman að heyra, en það vantar dagsetninguna á herlegheitin. Kemmst ekki inn á heimasíðu óbeislaðra fegurðar veit ekki ástæðuna. Það væri nú gaman að skella sér ef maður yrði fyrir vestan á sama tíma og þetta er. kveðja MILLA.

[Harpa Jónsdóttir (IP-tala skráð) 16.4.2007 kl. 17:38]

Ég kemst því miður ekki, en segi bara GÓÐA SKEMMTUN!

 Harpa J

[Jenný Anna Baldursdóttir, 16.4.2007 kl. 19:44]

Mér finnst þetta með afbrigðum flott hugmynd.  Vildi óska þess að keppnin í hinni óbeisluðu fegurð væri hér á höfuðborgarsvæðinu. 

[Katrín Snæhólm Baldursdóttir, 18.4.2007 kl. 17:41]

Og svo á netið með herlegheitin svo maður geti séð hvernig þetta fer fram..þetta frábærasta framtak í langan tíma. Húrra fyrir ykkur þarna fyrir  vestan!!!

[Fylkir Ágústsson (IP-tala skráð) 19.4.2007 kl. 15:24]

 

Matta -  til hamingju með þessa ÁRLEGU HEFÐ SEM NÚ HEFUR SKAPAST  að halda svona uppákomu til styrktar góðu málefni.