Að ganga fyrir horn, ekki keyra.

Hafið þið tekið eftir öllu fólkinu sem er með bílinn gróinn við afturendann á sér?  Ég á við þessa sem fara allt á bílnum,  í næstu götu eða jafnvel í þarnæsta hús.  Fólk sem tengir það að fara á milli staða ekki við fæturna á sér heldur við bílinn sinn.  Þeir sem eru virkilega illa haldnir, skilja bílana sína eftir í gangi helst upp á gangstéttinni beint fyrir framan, á meðan skroppið er inn í bakarí eða búð. 

Ég þekki margt svona fólk, til dæmis eina knáa bankakonu sem ég ætla raunar ekkert að vera að nafngreina hér,  en hún býr á Þingeyri og vinnur í Sparisjóðnum á Ísafirði.  Hún er þessi öra og drífandi týpa sem allt virðist geta og vílar ekki fyrir sér að hlaupa maraþon eða taka 50 armbeygjur með annarri hendi.  Ég sat með henni í kaffi á dögunum og hún þurfti að skreppa í ríkið, eins og gengur.  Auðvitað fór mín kona á bílnum sínum frá Langa Manga að ríkinu, sem eru sjálfsagt hátt í 50 metrar.   Vinnufélagar mínir í Snerpu fara flestirá bílnum í mat þó þeir ætli ekki mikið lengra en á næsta veitingastað.  Á Langa,  Fernandos eða Tai-Koon sem eru í tveggja mínútna göngufjarlægð.  Til að vera sanngjörn er þó rétt að benda á eina undantekningu, Bjössi fer aldrei á bílnum í mat. En Hann býr reyndar á hæðinni fyrir ofan Snerpu.  En þessir strákar eru auðvitað tölvunördar og ætla að viðhalda ímyndinni.  Ímyndinni um fölu og veiklulegu innipúkana í tölvugeiranum.  Það er líka til fyrirmyndar fólk sem alltaf labbar. Einsog Eygló sem labbar í vinnu alla daga, hún er reyndar ekki með bílpróf, en það kemur í sama stað niður.  Ég tók líka eftir því að það er sprungið á trukknum hennar Grétu svo hún fer sjálfsagt að iðka holla útiveru í einhvern tíma. 

 

Athugasemdir

[Ylfa Mist Helgadóttir, 9.9.2007 kl. 19:33]

Er þetta ekki einelti??

Þú bara nafngreinir hér fólk og blátt áfram hraunar yfir það!!??

Ég labba til dæmis EKKI í vinnuna en fæ ekki séð að það komi þér neitt sérstaklega við. Þaddna!

Annars líkar mér nýji persónulegi bloggstíllinn þinn... sjáumst í hádeginu á morgun elskulega. Þú færð linsubaunasúpu. Knúúúús...

[amma (IP-tala skráð) 9.9.2007 kl. 19:38]

Ég geng í vinnuna og í ríkið og á Langa Manga. Af hverju var ég ekki nafngreind ? Mér finnst að Gréta eigi að fara ríðandi um bæinn fyrst trukkurinn er sprungt. Nokkur hestöfl á þeim bænum er það ekki ?

[Ásthildur Cesil Þórðardóttir, 9.9.2007 kl. 20:07]

Einu sinni var ég að fara heim úr vinnunni, var þá í vinnu á Austuveginum, upp á gömlu bæjarskrifstofnum, þar sem ég er að bakka út úr stæðinu við Sjallan, kemur ekki kona hlaupandi, hún vann í Landsbankanum, viltu ekki skutla mér heim, sagði hún, veðrið er svo vont, hún bjó þá á Austurvegi 13.  Hehehehe... ég get bara ekki gleymt þessu.

En Eygló er náttúrulega hetja, það sá ég í drulluboltanum í sumar.  Og jamm Gréta á að skríða um bæinn, og kalla á Ésú í öðru hverju hnjáspori svona upp á sportið

[Gréta Skúla (IP-tala skráð) 9.9.2007 kl. 22:52]

Svo það varst þú sem hleyptir loftinu úr dekkinu ! það er ekkert sem þú gerir ekki til að fá mann í að LABBA.....

Hvernig dettur ykkur í hug að ég fari labbandi  eða hvað þá skríðandi , nei hættið nú alveg.....er ég ekki nógu lávaxinn fyrir ? En stelpur þegar maður á svona græju, halló.. það er eins gott að nota hann (ég meina bílinn) fyrst maður er að standa í því að reka þennan yndislega munað sem bíllin er.  Hann gerir lífið svo miklu einfaldara, svo er bara að stinga niður nokkrum grænum hríslum til að friða samviskuna.  

[Bessa (IP-tala skráð) 10.9.2007 kl. 00:16]

Bara að kvitta fyrir komuna, rambaði inn á síðuna þína, þú ert frábær penni.  

[Sú spræka frá Þingeyri..... (IP-tala skráð) 10.9.2007 kl. 14:10]

Þegar maður er með magnafslátt í Ríkinu,  þá er spurning hversu mikið er hægt að bera......þrátt fyrir hreysti.......hahaha...

[Gló Magnaða, 10.9.2007 kl. 14:55]

Og það er sko að mjög vel athuguðu máli að ég er ekki með bílpróf.

Kostirnir eru miklu fleiri en gallarnir.  Einn kostana er sá að maður gengur alltaf í vinnuna. Ég læt ykkur eftir að finna alla hina.