Er léttara að vera jákvæður?

Þessa dagana er mikið skrifað um geð enda alþjóða geðheilbrigðisdagurinn, sem er einskonar afmæli geðsins, þann 27. október næst komandi.  Og þar sem ég er ein af þessum heppnu, sem hafa dottið í þunglyndi, er er mér ljúft og skylt að fjalla um geðorðin 10.  Þessi gullkorn sem prýða nú framhliðar ísskápa landsmanna, til að létta okkur lífið og gera okkur kátari.

Fyrsta geðorðið er:  Hugsaðu jákvætt, það er léttara.  Léttara?  Léttara fyrir hvern?  Ekki fyrir mig það er víst.  Það er miklu auðveldara að vera neikvæður og auk þess miklu skemmtilegra.  Það er nefnilega ekkert gaman að vera góður og jákvæður.  Hafið þið ekki tekið eftir því þegar þið eruð saman komin í hóp hvað það er litlaust og leiðinlegt þegar allir eru jákvæðir? Sammála.  Þögulir.

 Hugsum okkur til dæmis umræðuna um REI og kaupréttarsamningana.  Þessi umræða væri ekki svipur hjá sjón ef allir færu eftir þessu blessaða geðorði númer eitt.  Hvað um kvótann, loftslagsbreytingarnar, okurvextina og dómana í kynferðisbrotamálum.  Nei endalaus jákvæðni drepur niður eðlilega umræðu og er algjörlega fráleit hugmynd.  Við myndum missa alla fréttatímana, blöðin, bloggið og vera dæmd til að horfa á eilífa Spaugstofu.  Hjálpi okkur hamingjan.

Geðorð númer eitt er um tóma draumóra og í raun illa gert að ota svona nokkru að okkur þunglynda fólkinu.  Okkur líður auðvitað best þegar lífið er pínulítið ómögulegt.  Sá sem samdi þetta hefur örugglega aldrei spáð í það hvað það getur verið gaman að hafa allt á hornum sér. Verið nú ekkert að misskilja mig það er alveg hægt að vera neikvæður og skemmtilegur.  Neikvæður og líða vel.  það má segja að ég hafi komist að þeirri niðurstöðu að það sé mjög jákvætt að vera neikvæður. 

Af augljósum ástæðum treysti ég mér ekki til að lesa fleiri geðorð að sinni. 

Athugasemdir

[Ásthildur Cesil Þórðardóttir, 16.10.2007 kl. 08:35]

Matthildur mín, þú ert gangandi dæmið um skemmtilega neikvæðni, og nú má ég ekki segja meira, svo þú fáir ekki kast

[Þórdís Einarsdóttir, 16.10.2007 kl. 11:27]

Halelúja!

Þ 

[Ylfa Mist Helgadóttir, 16.10.2007 kl. 13:15]

Dísus.....

[Guðrún Emilía Guðnadóttir, 16.10.2007 kl. 16:11]

Frábært!!!!!!!!
Það er ekkert skemmtilegra en að vera neikvæður í skemmtilegheitum.
Ég elska að etja við eða um eitthvað eða einhvern,
síðan er fólk að reina að segja sína skoðun, allt vel með það.
Sko, reyni það svo að koma sínum skoðunum inn hjá mér,
eins og flestir gera.(hafið þið ekki tekið eftir því.?)
þá fyrst kemst ég í málæðis stemmningu,
svo afar hárfínt að meira að segja hundurinn skríður með veggjum
það reynir að malda í móinn, þá segi ég:
,,fyrirgefið en fæ ég að hafa mína skoðun þið getið haft ykkar."
Svipurinn sem kemur á viðkomandi er óborganlegur, því í öllu sínu
skoðana eigingirni, gleymir það samskipta prúðleikanum. Dæ.Dæ.
Neikvæð:  "NEI" það hef ég aldrei verið.
Í minni sókn kallast þetta jákvæðni,
hugsið þið ykkur maður getur talað og hefur skoðun.
Líka það að ég hef alltaf staðið í þeirri trú að
ég hefði rétt fyrir mér í 99,9% tilfellum, það er munur.

[amma (IP-tala skráð) 16.10.2007 kl. 18:58]

Það er örugglega ekkert gaman á spurningakeppninni minni á fimmtudagskvöldum ef ég væri jákvæð, hógvær og stillt ! Sammála þér í einu og öll. NEMA helv. kennitölumálinu.

[Vilborg Davíðsdóttir (IP-tala skráð) 16.10.2007 kl. 21:49]

Fátt sem fer jafn hroðalega í taugarnar og gerir mig jafn arfa neikvæða eins og fólk sem er sífellt að blaðra um hvað jákvætt hugarfar sé gasalega mikilvægt (jafnvel þótt ég sé sammála því).  Amen við þessum pistli.