Loks geðorð sem ég skil, þekki og nota

Þriðja geðorðið Haltu áfram að læra svo lengi sem þú lifir get ég skilið.  Raunar hef ég alltaf verið að læra og býst fastlega við að læra fram á grafarbakkann.  í það minnsta ef minnið fer ekkert að skána.  Ég er nefnilega svolítið gleymin stundum og þarf því að læra nöfn, símanúmer og þess háttar aftur og aftur.  Man ekki hvar ég lagði bílnum eða hvort ég var á bílnum.  En það er bara gaman að koma sjálfum sér á óvart.  Ég býst við að þetta sé það sem átt er við í geðorðinu góða er þetta ekki líka stundum kallað símenntun.

Ég er alltaf svolítið veik fyrir námskeiðum og hef farið að fleiri en ég hef tölu á.  Þá erum við að tala um allt frá virðulegum námskeið um rekstur, bókhald, tölvur, markaðsfræði, stjórnun, rökfræði, stærðfræði að lista og handverks námskeiðum á borð við mósaík, þæfingu, glerbræðslu, teikningu, tálgun, silfur- og eldsmíði svo eitthvað sé nefnt.  Að vísu hafa þessi námskeið skilið mis mikið eftir sig. Einsog um árið þegar ég fór að læra tímastjórnun en gaf mér aldrei tíma til að innleiða vinnubrögðin sem mér var kennt og svei mér þá ef mappan er ekki enn í stóra staflanum lengst til vinstri á skrifborðinu mínu.  Ólesin. 

 Þetta var náttúrulega allt of jákvætt blogg ég skil ekki í mér að hafa ekki komið auga á neitt neikvætt.  Ég lofa að bæta mig enda næsta geðorð vel til þess fallið.

 

Athugasemdir

[Gló Magnaða, 18.10.2007 kl. 13:42]

Ég er blönk........ Hvaða bölvuð jákvæðni er þetta??

Dettur ekkert í hug til að kommenta......

Er hægt að hafa svona söfnun á heilasellum?

[Ásthildur Cesil Þórðardóttir, 18.10.2007 kl. 16:57]

ég fylgist með af alefli

[Guðrún Emilía Guðnadóttir, 18.10.2007 kl. 19:29]

Við lærum svo lengi sem við lifum, þessi boðsettning hefur verið til svo lengi sem ég man eftir mér,og er það afar langur tími
þessu var bara á einhverjum tímapunkti breytt í geðorð.

[Ylfa Mist Helgadóttir, 18.10.2007 kl. 22:30]

Námskeið eru ömurleg....