Mál Matthildar

22.2.2008 | 13:37

Að hafa stjórn á sínum eigin heila

Stundum þegar mikið er að gera og ég hef alls ekki tíma til að láta hugann reika, hvað þá festa hugsanir á blogg, er það einmitt það eina sem ég fæ heilann til að gera. Þó það eigi að heita svo að við stjórnum okkur sjálf og höfum fullt vald yfir því sem við gerum og hugsum, verður að segjast alveg eins og er að það er flóknara en fólk gæti haldið.

Ég er til dæmis frekar upptekin þessa dagana enda á förum til New York og þarf að búa svo um hnúta á mínum vinnustað að strákarnir haldi ekki að ég sé þessi ómissandi. Að ráði kunningjakonu minnar setti ég setti fingurinn í vatnsglas og þegar ég tók hann upp úr sá ég að holan eftir fingurinn hvarf samstundis. þetta á að segja mér að fyrirtækið verði ekki horfið þó ég skreppi frá. Sama kunningjakona laumaði því líka að mér, þegar hún sá efasemdasvipinn, að fólk sem ekki næði þessu væri sjúklega stjórnsamt. Það sem ég vil alls ekki kannast við að vera stjórnsöm, hvað þá sjúklega stjórnsöm, náði ég samhenginu strax. Ætla því með hjálp tækninnar að stjórna fyrirtækinu með hæfilegri blöndu af fjarlægðarstjórnun og fram í tímann stjórnun. Þeir munu varla taka eftir því að ég verð ekki á staðnum.

Í stað þess að klára verkefnalistann hef ég eytt tíma mínum í þessa bloggfærslu, kvefast og láta hugann reika. Þessi færsla er því fórn mín til ósjálfráða hluta heilans sem vonandi hefur fengið nóg af slugsi og leyfir mér að fara að vinna strax og ég hef lokið þessari færslu með punkti.

Flokkur: Bloggar | Facebook

Athugasemdir

Bon Voyage mín kæra.

Ylfa Mist Helgadóttir, 22.2.2008 kl. 14:15

Það eru allir ómissandi - bara misjafnlega.

Ég er til dæmis mjög ómissandi. Enda hef ég aldrei komist til nújork eða svoleiðis staða. Kemst bara ekki.... vegna þess að enginn getur leyst mig af í neinu.

Gló Magnaða, 22.2.2008 kl. 16:23

Heyrði lokin af viðtalinu við þig og Magnús Reynir Matthildur mín. Mikið er ég stolt af þér. Góða ferð og hafðu það sem allra best. Þú ferð með góðan hug frá okkur öllum trúi ég umvafinn okkar hreykni og góðum hugsunum. Komdu svo bara heil heim aftur og vertu búin að gera þér í hugalund næsta skúbb sem við svo framkvæmum með glans.