Geðveiki dagurinn

Í dag er alþjóðlegi geðheilbrigðisdagurinn.  Í tilefni af því langar mig að hvetja alla þá sem telja sig vera haldna geðheilbrigði af einhverju tagi að gera eitthvað geðveikt.  Það jafnast ekkert á við  gera eitthvað skrítið og heimskulegt ef maður hefur gilda afsökun.  Í dag höfum við góða og gilda afsökun. Í dag mega allir vera geðveikt eitthvað.

Í tilefni dagsins ætla ég að segja ykkur frá konu sem hagaði sér geðveikt asnalega. Hún byrjaði daginn með því að fara í líkamsrækt, hjólaði aftur á bak í spinning og valhoppaði á hlaupabrettinu.  Til að tryggja sér athygli allra á stöðinni, sem fær einning að njóta nafnleyndar, mætti hún í íþróttabuxunum á röngunni svo skein í hvíta klofbótina.   Því næst bakkaði hún í vinnuna enda einstefna og mikilvægt að bíllinn snéri rétt ef löggan kæmi.   Í vinnunni lék hún heilbrigða manneskju af mikilli innlifun og fara engar sögur af því.  Geðveikar konur þurfa að borða eins og aðrar konur og því skrapp hún út í búð.  Henni virtist dagurinn vera gulur, því keypti hún banana, gul epli, sítrónu, léttmjólk, sinnep, pasta og ost.  Matur í öðrum lit vakti ekki áhuga hennar enda algjört stílbrot að kaupa jarðarber á gulum degi.  

 

 

Athugasemdir

[Gústi (IP-tala skráð) 10.10.2008 kl. 16:33]

Þú lífgar upp minn geðveika dag :D

[Ylfa Mist Helgadóttir, 10.10.2008 kl. 16:54]

En hvað gerir maður ef maður hefur ekki af geðheilbrigðinu að státa?? Svona í tilefni dagsins? Lætur eins og geðheilbrigður?

[gunna (IP-tala skráð) 10.10.2008 kl. 20:36]

Og eigum við að fara saman í ræktina í fyrramál ? til að ná geðinu aftur ? og af okkur sítrónunni ? og sinnepinu ?

[Hjördís Þráinsdóttir, 11.10.2008 kl. 21:10]

Það vill svo skemmtilega til að á miðvikudaginn varð ég geðheilbrigð (nokkurn veginn) og gat því leyft mér að vera geðveik í gær (fara á kaffihús með þér m.a.).

[Matthildur Ágústa Helgadóttir Jónudóttir, 13.10.2008 kl. 09:10]

Já það var geðveikt gaman hjá okkur, sokkur.